Shkencëtarët çdo ditë e më shumë po avancojnë në lidhje me mposhtjen e koronavirusit, ndërsa ende po testohen disa modele vaksinash. Duket si diçka e largët ideja për të patur një vaksinë konkrete, ku do aplikohej tek popullata, por kërkuesit kanë dalë në një përfundim shokues.
Shkencëtarët francezë kanë mundur që të eliminojnë koronavirusin në një temperaturë shumë më të lartë sesa mendohej më parë. Ata janë befasuar nga rezistenca ndaj temperaturave të larta të treguara nga coronavirusi SARS-CoV-2 që shkakton sëmundjen COVID-19, në një nga shumë testet laboratorike që ata realizuan javët e fundit.
Në një shkrim të përgatitur nga Universiteti Aix-Marseille në jug të Francës, u vërtetua se koronavirusi mund të mbijetojë në temperaturë deri në 60 gradë celsius për një orë.
Si pasojë e këtij zbulimi në laborator, ekipi akademik i drejtuar nga profesori Remi Charrel e solli virusin pothuajse në pikën e vlimit, në mënyrë që ta vrasin plotësisht, pa lënë asnjë gjurmë. Ekipi francez zbuloi se një temperaturë më e lartë, mund të ndihmojë në zgjidhjen e problemit.
Eksperimenti
Pasi u nxehën për kohën e paracaktuar për 60 minuta, në temperaturën prej 60°C, llojet virale në mjedisin e pastër u eliminuan. E njëjta gjë nuk ndodhi në mjedisin e ndotur, ku disa prej tyre mbijetuan pavarësisht nga temperaturat e larta.
Në bazë të studimit të kryer në kushte laboratorike, u zbulua se koronavirusi jeton në ajër për më shumë se tre orë. Nga momenti që shpërndahet në ajër deri në 3 orë, sasia e tij ulet, por mbijetesa e virusit vazhdon të jetë përtej asaj që mendojmë ne.
Deri më tani vlerësimet janë bazuar në përvojën e viruseve të tjerë që transmetohen nga një person tek tjetri përmes frymës, të folurit, kollës apo tështimës. Virologu nga Milano, Carlo Fedrico Peno, ka shpjeguar se në një dhomë ku qëndron një person i infektuar, fryma e tij vazhdon të përqëndrojë grimcat virale në ajër. Për këtë arsye, në vende të mbyllura dhe ku ka shumë njerëz, edhe kur respektohet distanca fizike, është mirë që dritaret të mbahen hapur.
