Barcelona është një fabrike e talenteve në Europë, por jo të gjithë arrijnë të depërtojnë deri në ekipin e parë dhe zgjedhin të largohen në klube, që u japin më shumë mundësi. I tillë është shembulli i Andre Onana. Portieri kamerunas është rritur në La Masia, për të kaluar më pas te Ajax.
Te holandezët Onana ka arritur të spikasë me aftësitë e tij dhe ishte një shtyllë shumë e rëndësishme në arritjet e Ajax të sezonit të kaluar. Onana tashmë pret të bëjë hapin e madh të karrierës dhe në një intervistë për mediet europiane shprehet se dëshiron të kthehet te Barcelona.
Barcelona është shtëpia ime, kam raporte të mira me presidentin dhe trajnerët. Nëse do më duhet të kthehem, unë do kthehem atje, por është shumë herët për të diskutuar transferimin. Jam futbollist i Ajax, të shohim çfarë do të ndodhë në fund të sezonit. Këto punë i përkasin agjentit tim“, tregoi Onana.
24-vjeçari është objektiv i një sërë ekipesh në mbarë Europën dhe për momentin Barcelona ka si objektiv rinovimin me Ter Stegen. Në rast të dështimit të marrëveshjes me gjermanin, me siguri Onana pritet të rivishet me ngjyrat blaugrana.
