OBSH ka bërë me dije se po shqyrton disa nga raportet e pacientëve të cilët kanë rezultuar sërish pozitivë pasi janë shëruar një herë nga koronavirusi.
Mediat e huaja raportojnë se në Korenë e Jugut janë raportuar të paktën 91 raste të tilla.
Drejtori i Qendrave Koreane për Kontrollin dhe Parandalimin e Sëmundjeve, Jeong Eun-kyeong, tha se virusi mund të jetë “riaktivizuar” në trupat e tyre.
Ai u pyet nga Reuters në lidhje me këtë çështje në konferencën e mbajtur për mediat. Organizata Botërore e Shëndetësisë u përgjigj duke thënë se “janë të vetëdijshëm për këto raporte”.
“Këto raste ne po i shqyrtojmë për së afërmi me ekspertët tanë klinikë dhe po punojmë shumë për të marrë më shumë informacione për ato raste individuale. Është e rëndësishme që kur grumbullohen mostrat e testimit nga pacientët e dyshuar, të ndiqen procedurat ashtu siç duhet”, tha OBSH-ja.
Siç ka udhëzuar edhe më parë OBSH, një pacient mund të lirohet nga spitali pas dy rezultateve të njëpasnjëshme negative me distancë kohore të testimit të paktën 24 orë.
Zyrtarët shëndetësorë të Koresë së Jugut thanë të premten se mbetet e paqartë se çfarë fshihet pas këtij trendi, dhe se hetimet epidemiologjike janë duke vazhduar.
Nga ana tjetër OBSH u shpreh se virusi është një sëmundje e re dhe se duhen më shumë të dhëna epidemiologjike për të dalë në përfundime të caktuara.
Mbi 1,7 milionë njerëz nga e gjithë bota janë prekur nga COVID-19, ndërsa mbi 108 mijë persona kanë humbur jetën.
