Ish-kryeministri i qeverisë së Pajtimit Kombëtar, Bashkim Fino ka bërë një krahasim të situatë së krijuar nga përhapja e koronavirusit në vend, me krizën e ‘97.
I ftuar në emisionin “Kjo Javë” në News24, Fino tha se kriza e vitit 1997 ishte më e thjeshtë për t’u menaxhuar sesa situata e krijuar nga pandemia e COVID-19.
Ai tha se kriza e atëhershme ishte vetëm e Shqipërisë, ndërsa kjo e sotmja është e gjithë botës. Fino tha se në ’97 vendi kishte ndihmën e miqve ndërkombëtarë si SHBA apo BE, ndërsa sot të gjithë janë fokusuar në zgjidhjen e krizës në vendet e tyre.
“Unë mendoj që ka ndryshim të jashtëzakonshëm, nuk është e njëjta gjë. Dhe atëherë ishte një krizë shumë e rëndë por mos harrojmë ishte e Shqipërisë dhe jo globale.
Nga kjo pikëpamje ’97 ishte më e thjeshtë për të menaxhuar dhe zgjidhur. Jo vetëm unë si kryeministër por edhe evropian dhe amerikan ishte në ndihmë të atij momenti kolapsi për ta kaluar.
Në rastin në fjalë është një epidemi mbarë globale që të gjithë vendet luftojnë për veten e tyre. Sot vendet luftojnë kush të marrë më shumë respiratorë, maska etj. Vende si Shqipëria i ka me pakicë, me deficit, për mjekët dhe popullsisë.
’97 nuk mund të krahasohet me 2020. Menaxhimi i asaj krize ishte shumë më e thjeshtë dhe i kuptueshëm pasi qytetarët kishin dalë nga një skemë piramidale dhe populli ishte ngritur ndaj qeverisë së vet dhe ishin pushtuar gjithë depot e armatimit.
Nuk po them që nuk kishte vështirësi por ishte në një krizë copëtimi, vëllavrasje pasi të gjithë ishin të armatosur por ishte kriza jonë shqiptare, e lokalizuar. Duke e krahasuar dhe me këtë pandemi ndihma nga BE dhe forca shumëkombëshe në prill i dhanë mundësinë dhe ndihmë Shqipërisë për të përballuar krizën. Ishin prezente me forca ushtarake për të menaxhuar situatën. Për të pasur qetësi dhe për të bërë zgjedhje të mirëkuptuara.
Prandaj them që ka ndryshim, ishte kriza e shqiptarëve dhe e përballuam si qeveri dhe vlen të falenderojmë miqtë ndërkombëtarë madje dhe takimet e mia në 6 muaj ishin intensive”, tha deputeti socialist.
