Në kohën kur Italia dhe Spanja po përballen me ditë të vështira dhe humbje të shumta në njerëz për shkak të koronavirusit, Turqia u ka shprehur solidaritetin e saj.
Turqia u ka dërguar dy shteteve në fjalë produkte të ndihmës mjekësore.
Agjencia e lajmeve “Anadolu” ka raportuar se një avion ushtarak për mallra është nisur nga aeroporti ushtarak Etimesgut në Ankara.
Ai është ngarkuar me mijëra produkte të ndihmës mjekësore të tilla si maska, veshje mbrojtëse dhe dezinfektues antibakteriale të cilat janë të prodhuara në vend.
Një detaj që ra në sy ishte se mbi kutitë e ndihmës është vendosur një letër ku është shkruar në gjuhën italiane dhe spanjolle një shprehje e poetit dhe dijetarit turk Xhelaludin Mevlana (Rumi):
“Pas dëshpërimit ka shumë shpresë. Pas errësirës ka shumë diell”.
Raportohet se avioni i nisur me ndihmat e Turqisë nga Ankaraja fillimisht do të shkojë në Spanjë dhe më pas në Itali.
