Një lajm i bujshëm nga Italia që gjen vend në faqet e para të gazetave spanjolle. Kur bëhet fjalë për Kristiano Ronaldon gjithmonë ka interes në të gjithë botën. Juventus rrezikon që të humbasë shërbimet e kampionit portugez për shkak të krizës ekonomike që e ka përfshirë nga koronavirus.
Kristiano Ronaldo si një “zotëri” i vërtetë pranoi që të ulte rrogën e tij në këtë moment të vështirë ekonomik që po kalojnë bardhezinjtë dhe e gjithë bota e sportit, por kjo nuk mund të zgjasë përgjithmonë. “Il Messagero” shkruan se bardhezinjtë mund ta sakrifikojnë Ronaldon për të balancuar disi bilancet e tyre.
Ronaldo është një imazh i rëndësishëm për “Zonjën e Vjetër” dhe largimi nuk është kaq i lehtë sa mendohet, prandaj presidenti Anjeli po mendon strategjitë për të mos shkuar tek opsioni i fundit që lidhet me largimin e lojtarit. Fillimisht do t’i ofrojë një kontratë deri në vitin 2023 me një pagë më të ulët sesa ajo aktualja, e cila është 30 milionë euro.
Nëse Ronaldo nuk do të pranojë, atëherë mund të qëndrojë te kampionët e Italisë deri në përfundimin e kontratës aktuale. Por kjo do të bënte që bardhezinjtë ta humbnin me 0 euro në moshën 37-vjeçare. Opsioni i tretë është largimi i tij në merkaton e verës për më shumë se 70 milionë euro. Asnjë vlerë tjetër nën 70 milionë nuk do të merret në konsideratë.
Rikthim te Reali
Mes skenarëve të shumtë ekziston edhe rikthimi i tij në Madrid. Ky është klubi ku ai shkroi histori në Spanjë dhe në Europë prandaj nuk përjashtohet si mundësi që Florentino Perez ta telefonojë për ta rikthyer në “Santiago Bernabeu”.
