“Zëri i popullit, zëri i Zotit”. Me këtë thirrje nisi fjalimin Kreu i Shtetit Ilir Meta, ndërsa kërkoi nga ato që i cilëson si organizatat mafioze, të dëgjojnë thirrjen se kur institucionet bien, ngrihet populli.
“Ta dëgjojë mirë puçistët dhe organizatat mafioze që kërkojnë të rrëzojnë sovranitetin dhe kushtetutën tuaj. Ndaj ju kam ftuar, jo si Ilir Meta, por si presidenti juaj për të dëgjuar zërin tuaj”, tha ndër të tjera Meta.
“S’ulemi para askujt veç para Kushtetutës. Votuam sovranitetin që i përket vetëm popullit. Ndaj ju kam ftuar jo si Ilir Meta por si presidenti juaj, si i vetmi institucion legjimit që ka mbetur për të dëgjuar zërin tuaj, sepse kur institucionet bien, ngrihet populli, dhe populli nuk futet në xhep si paratë e oligarkëve.
Jeni këtu sepse Shqipëria e sotme është ndarë në dy botë antagoniste, në botën kuqezi dhe në grupin e vogël meskin e puçist të oligarkëve, që si shushunja pinë çdo ditë gjakun e popullit tonë”.
“Unë si president i kam rrëzuar publikisht këto dekrete, pa dekrete për konçesion, që i kanë vetëm një qëllim, grabitjen e Shqipërisë. Ata tani kërkojnë edhe rrëmbimin e Gjykatës Kushtetuese në mënyrë që oligarkët të fitojnë sa më shumë dhe krimet e tyre Kushtetuese të mbeten të pandëshkuara.
Jemi këtu sepse asnjë nga ne nuk mund t’i qëndrojë anash grushtit të shtetit. Jemi këtu, për t’u vendosur përballë sot, me nisjen e pranverës kuqezi, unë si Presidenti i Republikës dhe ushtari i parë i Republikës, kundër grushtit të shtetit.
Pse presidenti thirri popullin? Sepse i shteroi të gjitha përpjekjet institucionale për të parandaluar kapjen e shtetit, dhe sidomos grushtin e shtetit.
Presidenti thirri popullin, sepse po i vidhet çdo ditë ajo që Zoti i ka dhënë të gjithë shqiptarëve, sepse kemi drejtësi me regji, që godet të varfërit, të pambrojturit dhe garanton paprekshmërinë e klaneve pranë sektit që ka zaptuar shtetin. Borxhet po ritën në mënyrë katastrofike dhe po i paguani jo me pa të drejtë.
Sepse skandalet që e denoncon KLSh, prej miliarda eurosh bien në vesh të shurdhët për qeverinë, Kuvendin dhe Drejtësinë që fle, sepse ekonomia juaj është në ditët më të errëta, oligarkët kontrollojnë parlamentin”, deklaroi Meta.
Manifestimi i 2 marsit në bulevardin “Dëshmorët e Kombit”, u hap me himnin e flamurit. Sapo u ngjit në podium, presidenti i vendit, Ilir Meta ka zgjedhur që të ulet në gjunjë para protestuesve, duke bërë simbolin e shqiponjës.
