Policia ka identifikuar autorin e dyshuar të vrasjes së 28-vjeçarit Vilson Tafçiu, mbrëmjen e djeshme në zonën e ‘Astirit’ në Tiranë. Burimet thanë se autori i dyshuar është një person i njohur në rrethin shoqëror të viktimës.
Për këtë arsye, policia ka sekuestruar aparatin celular të Tafçiut, për të zbardhur më shumë detaje nga komunikimet e fundit që ai ka pasur. Autori i dyshuar që është shpallur në kërkim, ka inicialet N.D. Blutë e Tiranës kanë ushtruar kontroll në banesën e të dyshuarit, por nuk e kanë gjetur.
Vilson Tafçiu, 28-vjeç, u ekzekutua dje në zonën e ‘Astirit’, rreth orës 20.45. I riu ka qenë duke pirë kafe në një lokal në shoqërinë e një vajze, kur është thirrur të dalë jashtë nga një person. Në një rrugicë pranë lokalit ai është qëlluar me breshëri plumbash. Tafçiu ka qenë akuzuar si pjesë e një grupi të strukturuar kriminal i cili u godit në qershor 2018.
Ky grup ushtronte aktivitetin e tij kriminal në qytetet Shkodër, Lezhë, Kurbin dhe Malësi e Madhe. Gjatë kontrollit në makinat që ata udhëtonin, u sekuestruan 200 kg kanabis, 2 pistoleta, 1 kuti me 20 fishekë, 1 automjet tip Benz Mercedes, 1 BMW, 7 telefona celularë, një sasi lekësh dhe një radio marrëse e njëjtë si ato të policisë. Mësohet se viktima ka qenë i deportuar në vitin 2018 nga Franca për ‘trafik droge’, ndërsa përdorte të dy mbiemrat, Noka dhe Tafçiu.
