Gjenerata e re rrjetit të komunikimit (5G) ka rritur ndjeshëm shqetësimet për spiunim në vendet evropiane. Dje, Kancelarja gjermane Angela Merkel ka thënë se nuk ka pasur asnjë lloj presioni nga Pekini për të përfshirë Huawein në rrjetin 5G, edhe pse në vendet e tjera janë rritur shqetësimet që gjiganti kinez mund të shfrytëzohet për spiunim.
“Nuk kam dëgjuar për ndonjë presion nga autoritetet shtetërore kineze”, u ka thënë Merkel ligjvënësve gjermanë.
Edhe pse Huawei është ndaluar në SHBA dhe vende aleate, në Gjermania deri tani nuk ka pasur asnjë masë penguese për kompaninë kineze.
“Unë jam kundër përjashtimit të një kompanie, mirëpo preferoj të bëj gjithçka për të garantuar siguri”, ka thënë Merkel në një sesion pyetje-përgjigje në parlament.
Presidenti amerikan, Donald Trump ka urdhëruar kompanitë amerikane që të ndalin bizneset me këtë kompani, për shkak të shqetësimeve për spiunim.
Australia dhe Japonia po ashtu ka marrë hapa për t’ia ndaluar kompanisë përfshirjen në rrjetin 5G. Më herët gjatë këtij muaji, kryeministri britanik, Boris Johnson ka dhënë shenja se edhe Britania do të veprojë njëjtë.
