Qeveria shqiptare ka miratuar në parim memorandumin e bashkëpunimit me Shtetet e Bashkuara të Amerikës në lidhje me çështjen e rrejtit 4G dhe 5G.
“Vendim për miratimin në parim të memorandumit të mirëkuptimit ndërmjet Këshillit të Ministrave të Republikës së Shqipërisë dhe Qeverisë së Shteteve të Bashkuara të Amerikës për sigurinë 4G dhe 5 G. Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë, Këshilli i Ministrave vendosi:
Miratimin, në parim, të memorandumit të mirëkuptimit, ndërmjet Këshillit të Ministrave të Republikës së Shqipërisë dhe qeverisë së Shteteve të Bashkuara të Amerikës, për sigurinë 4G dhe 5G, sipas tekstit që i bashkëlidhet këtij vendimi”, thuhet në VKM.
Shtetet e Bashkuara janë të shqetësuara mbi përdorimin e pajisjeve teknologjike të prodhuara në Kinë.
Ambasada amerikane njoftonte ditë më parë se kompania Huawei shpreson të prodhojë dhe shesë pajisjet e saj të rrjetit 5G në të gjithë botën. Huawei ka selinë në Kinë, një vend pa një gjyqësor të pavarur ose një ligj të zbatueshëm. Kina madje ka një ligj që kërkon që kompanitë të ndihmojnë qeverinë për të spiunuar. Kjo do të thotë se nuk ka asnjë mënyrë për të sfiduar qeverinë kineze nëse urdhëron një kompani të spiunojë ose të vjedhë të dhëna.
