Poeti i njohur shqiptar, Shqiptar Oseku ka reaguar së fundmi përmes një postimi në rrjetin social Facebook, kundër shkrimtarit austriak Peter Handke.
Kujtojmë se ky i fundit u shpall fitues i çmimit Nobel në Letërsi për vitin 2019-të.
Oseku ka bërë publik një fjalim mjaft prekës kundër vendimit të Akademisë Suedeze për të nderuar me Nobel Peter Handke.
Reagimi i tij i plotë: “Fjala ime në manifestimin kundër vendimit të akademisë suedeze për të nderuar me Nobel apologjetin e gjenocidit Peter Handke:
Unë quhem Shqiptar Oseku, jam poet dhe vi nga Rrjeti Suedezo-Shqiptar. Nuk kam ardhur vetëm, jam me ambasadoren e Kosovës, me ambasadorin e Shqipërisë, e ambasadorët e Bosnes, të Kroacisë, të Turqisë, që refuzuan të hanë bukë e turp sonte.
Ata zgjodhën sonte më mirë të rrinë me ne, ndaj ne u themi faleminderit. Një falenderim edhe për organizatorët e këtij takimi, që na mundësuan t’i dalim zot të vërtetës sonë, të vdekurve e të gjallëve tanë.
Unë vi nga Gjakova, një qytet në kufi me Shqipërinë që pësoi Bosnen e vet me 1999. Rrugët e qytetit tim ishin si ato të Bosnes. Burra e gra të vrarë, dhunime, fëmijë e pleq të masakruar.
Por sonte këtu nuk dua të jem veç shqiptar. Sonte dua të jem edhe boshnjak. Dua të jem nga Sarajeva. Dua të jem nga Srebrenica. Nga Tuzlla. Nga Foca. Nga Jajce. Nga Bijelina. Nga Gorazhde. Sonte dua të jem nga çdo pëllëmbë e asaj Bosne që e mbytën në gjak kriminelët të cilët i justifikon Peter Handke.
Sonte jam edhe suedez, pse jam qytetar suedez tash sa dekada. Jam këtu me vajzën time që ka lindur në Suedi. Dhe si suedez dua të them atë që duhej ta thonte akademia suedeze sonte, sikur të mos ishte e mbytur në relativizëm moral. Dua të them se më vjen turp, sa turp. Dhe dua të ju them të gjithëve na falni: na falni që ju prekëm plagët.
Ju falemnderit!”
