Ministrja e Arsimit, Sportit dhe Rinisë, Besa Shahini ka inspektuar ditën e sotme nga afër shkollat e dëmtuara si pasojë e tërmetit të 26 nëntorit.
Ajo është shprehur se plani i zhvendosjes është gati, si dhe është siguruar transporti i të gjithë nxënësve nga shkollat e dëmtuara drejt shkollave pritëse.
Shahini shtoi se në ditët e para të shkollës duhet të bëhet një informim shumë i mirë i nxënësve për t’u mbrojtur dhe më pas për të marrë masa në rast emergjence.
“Tre ditët e para le ta nisim me fleksibilitet mësimin dhe të mësojmë ndjesitë e nxënësve, në mënyrë që ta kalojmë këtë gjendje emocionale që la pas tërmeti i 26 Nëntorit dhe pas-tërmetet që vijuan. Çdo shkollë tashmë ka një plan të qartë dhe të detajuar për mbrojtjen ndaj dukurive natyrore siç është tërmeti, si dhe për daljen emergjente të të gjithë nxënësve dhe mësuesve nga godinat e shkollave. Çdo kat ka një koordinator përgjegjës për daljen emergjente”, tha ajo.
