Profesori maqedonas Mihail Garevski tregoi se tërmeti më i gjatë në historinë botërore është shënuar në Alaskë, dhe zgjati rreth 3 minuta.
I ftuar në “News24”, Garevski u shpreh se tërmetet me magnitudë 4 apo 5 zgjasin me sekonda. Ndërsa shtoi se sa më e lartë të jetë magnituda e tërmetit, aq më shumë zgjat ai.
Ndër të tjera, profesori theksoi se reagimi i ndërtesave varet nga sistemi i mirë ndërtues, materialet cilësore dhe kushtet e themeleve, por gjithashtu ka të bëjë dhe me cilësinë e tokës.
“Pjesa më e madhe e ndërtesave reaguan mjaft mirë. Të gjitha këto ndërtesa, që kanë sjellë një reagim linear, do të reagojnë njëlloj me tërmetet e tjera në të ardhmen. Pra, qytetarët duhet të jenë të qetë për tërmetet e ardhshme, ndërtesat nuk e humbasin forcën, vetëm se kanë përballuar një tërmet.
Ndërtesat e dëmtuara ishin me katër apo shtatë kate. Tërmeti zgjati me sekonda. Kjo nuk do të thotë se ndërtesat e larta me 20 kate do të reagojnë jo mirë. Reagimi i ndërtesave varet nga sistemi i mirë ndërtues, materialet e mira dhe varet shumë nga kushtet e themeleve, por reagimi ka të bëjë dhe me cilësinë e tokës. Nuk ka rëndësi nëse ndërtesa do të jetë 20 katëshe apo 3 katëshe, nëse është sistemi i zgjedhur mirë dhe materialet e mira, atëherë tërmeti përballohet.
Tërmeti më i gjatë që ka ndodhur ka qenë në Alaskë dhe ka zgjatur 3 minuta. Sa më e lartë të jetë magnituda edhe kohëzgjatja është më e madhe. Këto tërmete me magnitudë 4, 5, zgjasin me sekonda. Sa më shumë zgjat një tërmet, aq më shumë dëme shkaktohen”, deklaroi profesori.
