Ministrja e Mbrojtjes, Olta Xhaçka, bën të ditur se për më shumë se 1 javë, dy avionë “MC-130J Commando II” të Krahut të Operacioneve Speciale ajrore amerikane, kanë fluturuar në hapësirën ajrore shqiptare.
Përmes një postimi në Facebook, Xhaçka shprehet se këta avionë kanë përdorur si bazë aeroportin e Rinasit. Ndërsa shton se si bazë është përdorur edhe ai i Kuçovës, ku është shënuar ulja e parë në 20 vite të një avioni me përmasa të tilla.
Sipas saj, këto tregojnë se Forcat Speciale shqiptare janë të afta për të marrë pjesë në operacione speciale bashkë me kolegët e tyre amerikanë.
Postimi i plotë:
Forcat Speciale shqiptare treguan se janë të afta për të marrë pjesë në operacione speciale bashkë me kolegët e tyre amerikanë.
Për më shumë se 1 javë, dy avionë “MC-130J Commando II” të Krahut të Operacioneve Speciale ajrore amerikane fluturuan në hapësirën ajrore shqiptare dhe përdorën bazat e Rinasit dhe Kuçovës, duke shënuar te kjo e fundit, uljen e parë në 20 vite të avionëve me të tilla përmasa.
