Përveç Alvin Berishës, i cili disa ditë më parë la kampin Al Hol në Siri, në vendin famëkeq ndodhen edhe shumë shqiptarë të tjerë.
Ndër ta është edhe vogëlushi 10-vjeçar, Osama Fidani, së bashku me familjen e tij.
Osama u shfaq në një intervistë në televizionin “A2CNN” në një reportazh të regjistruar atje.
Ai është djali i Bekim Fidanit nga Gostivari i Maqedonisë së Veriut i cili 6 vite më parë mori me vete familjen në Siri.
Bekimi është zhdukur në kamp, ndërsa Osama po qëndron me të ëmën, dy vëllezërit e tij Fidanin, 14 vjeç, Advanin 8 vjeç dhe motrën që ka lindur në Siri, Rejani 4 vjeç.
Mamaja e Osamës ka kërkuar ndihmë për t’u larguar nga kampi, pasi sipas saj nuk mund të jetohet në ato kushte të tmerrshme.
“Me na marrë dikush se kushtet i shikoni vetë në televizor. Sepse nuk rrihet këtu sepse është ftohtë”, u shpreh ajo.
Vëllai i Bekimit, Habib Fidani, ndodhet në Gostivar dhe e viziton shpesh shtëpinë e tyre prej mallit, megjithëse ajo qëndron e mbyllur prej 6 vitesh.
Ai i bën thirrje të vëllait, për të cilin dyshojnë se e mbajnë në burg, që të kthehet pasi ka kush e pret.
Gjithashtu, ai tregon ndjesitë në momentin që ka parë Osamën në ekran.
“E njoha. Kishte ndryshuar, ishte rritur, Kur ikën nga këtu ishin të vegjël. Ishte rritur ishte bërë i madh. Nga tiparet ka ndryshuar shumë pak. Është ashtu si e mbaj mend unë. U ndjemë shumë mirë për faktin që gazetarët tuaj kishin marrë guximin për të hyrë në atë kamp.
Nga ana tjetër, pasi pamë regjistrime u prekëm në aspektin e kushteve se si jetojnë ata në kamp. Vij gati çdo ditë dhe vizitoj shtëpinë e tyre. Kam shumë mall për ta sa nuk përshkruhet. Mbesa quhet Rejani dhe ka lindur atje”, tha xhaxhai i 10-vjeçarit. /Lapsi.al
