Kryetari i Partisë Liberal-Demokratike të Serbisë, Çedomir Jovanoviç thekson se Serbia ka kapitulluar në Kosovë. Ndërsa shton që janë kryer masakra çnjerëzore nga ushtria serbe. Por e konsideron të nevojshme që të gjendet një zgjidhje.
“Natyrisht. Kapitullimi ka qenë njësoj si gjermanët në vitin ‘45 kur fillimisht kapitulluan te amerikanët dhe më pas arriti Zhukovi dhe u tha ejani sërish dhe kapitulluan edhe për rusët”, shprehet deputeti serb për “Tv Klan”.
I pyetur nga gazetarja nëse Serbia shfaqet e gatshme të bëjë një marrëveshje përfundimtare, Jovanoviç u përgjigj negativisht. “Nuk është e gatshme, ashtu siç nuk është e gatshme as Kosova”.
Po ashtu, ai ka folur dhe për influencën ruse në shtetet e rajonit. Sipas tij, Rusia është ajo që e pengon realizimin e një marrëveshjeje; ndërsa për Shtetet e Bashkuara deklaroi se nuk janë treguar koherentë.
“Rusët nuk do ta lejojnë konsolidimin e kësaj pjese të Evropës. Kjo nuk është në interesin e tyre. Kjo është politika e tyre. Rusëve duhet t’ua kesh frikën, këtyre të tjerëve nuk mund t’u besosh. A ishte Hojt Ji, pastaj Mitchell, Palmer kurse tani Grenell…me kë jemi duke biseduar”?
Jovanoviç, i cili ka qenë një nga zërat e fuqishëm kundër politikës serbe të viteve ’90, këmbëngul që Serbia duhet ta kishte njohur pavarësinë e Kosovën.
