Familjarët e ekstremistit të minoritetit grek, Kostandinos Kacifas, nuk janë lejuar të marrin pjesë në ceremoninë e nderimit të ushtarëve grekë të rënë në luftë me italianët. Ata kishin përgatitur një baner me emrin e Kacifas, dhe datën e vrasjes, por policia i ka ndaluar të hyjnë në ceremoni.
Në një prononcim për mediat, motra e të ndjerit tha se policia rrethoi të atin, sapo panë foton e të vëllait. Ajo kishte shprehur frikën se mos ishin të armatosur, ndërsa e ka cilësuar si skandal për qeverinë lidhur me këtë situatë.
Më tej, e motra e Kacifasit drejtoi gishtin mbi drejtuesit e shtetit, si fajtorë të vetëm. “Kisha frikë mos ishin të armatosur. Turp, skandal për qeverinë shqiptare se ne jemi grekë autoktonë. Jemi në tokë greke. Populli nuk ka faj, e kanë fajin drejtuesit e shtetit”, janë disa nga fjalët e motrës së Kostandinos Kacifas.
Më pas ajo ka shkuar bashkë me prindërit në fund të ceremonisë, duke hedhur akuza ndaj shtetit shqiptar. Thirrjeve të saj dhe familjarëve të tjerë ‘Kacifa jeton, ti na drejton’, nuk i është bashkuar asnjë nga të pranishmit në ceremoni.
