Sikundër kishte paralajmëruar, Komisioni i Venecias publikoi raport-opinionin në lidhje me interesimin e Kuvendit të Shqipërisë, për çështjen e shkarkimit ose jo të kreut të Shtetit, Ilir Meta, pas dekretit që anuloi zgjedhjet e 30 qershorit.
Sipas ekspertëve të Komisionit të Venecias, Presidentit i duhet një bazë ligjore ad hoc (të posaçëm), për të shtyrë zgjedhjet.
“Në përgjigje të kërkesës për një mendim nga Kryetari i Kuvendit të Shqipërisë, Komisioni i Venecias arrin në përfundimin se, në mungesë të një dispozite ligjore për këtë çështje, Presidenti mund të anulojë zgjedhjet për organet e qeverisjes vendore në një situatë e cila plotëson kriteret për marrjen e masave emergjente. Edhe atëherë Presidentit i duhet një bazë ligjore specifike – ad-hoc – për të shtyrë zgjedhjet”, thuhet në opinionin e Venecias, i cili mban datën 14 tetor.
“Në përfundim, edhe nëse Presidenti ka ndjekur një qëllim legjitim, as Kushtetuta, dhe as Kodi Elektoral nuk i japin Presidentit ndonjë pushtet në përgjithësi për të pezulluar zgjedhjet, dhe për të vendosur një datë të re”.
…”Shtyrja e zgjedhjeve lokale, tejkaloi kompetencën e Presidentit. Do të jetë Parlamenti dhe Komisioni Hetimor dhe përfundimisht Gjykata Kushtetuese që do të vendosi nëse kjo ishte një shkelje e Kushtetutës dhe nëse është kështu, nëse ishte mjaftueshëm ‘serioze’, në kuptimin e artikullit 90 të Kushtetutës, për të çuar në procedurat e shkarkimit”.
Venecia thotë se edhe në rastin e procedurës së shkarkimit që shkon në Gjykatën Kushtetuese, atëherë ajo “duhet të ketë të paktën 6 gjykatës”.
Ndërsa lidhur me seriozitetin e tejkalimit të kompetencave nga Presidenti, ekspertët e Venecias thonë “Parlamenti dhe Komisioni i tij Hetimor duhet të marrë në konsideratë një numër faktorësh që ngrenë pyetjen, nëse akti ishte i një natyre mjaftueshëm seriozë”.
Duke përmendur një numër faktorësh, Komisioni i Venecias thotë se pezullimi dhe më tej shtyrja e zgjedhjeve lokale, “mund të mos plotësojë kriteret e kërkuara për seriozitet të mjaftueshëm, për të iniciuar procedurat e shkarkimit”.
“Në përfundim, edhe nëse provohet serioziteti i shkeljeve, kjo jo domosdoshmërisht çon në shkarkim të Presidentit, duke marrë parasysh pushtetin e Sesionit Parlamentar të Parlamentit, për të patur parasysh qëllimet Kushtetuese siç janë ekuilibrat e pushteteve”.
Klikoni linkun më poshtë:
