Lëvizja Demokratike e Kosovës ka nisur spastrimin e emrave problematikë nga radhët e saj. Thuhet se largimi i personave është bërë me arsyetimin se kandidimi bie ndesh me parimet demokratike dhe ato ligjore. Mediat kosovare raportojnë se Haki Raqi nuk do të jetë kandidat i LDK-së për deputet në zgjedhjet e 6 tetorit. Ky është vendimi i kryetarit të kësaj partie, Isa Mustafa, pasi u raportua se Raqi rezulton se ka kryer vepër penale.
“Çdo kandidat i LDK-së që identifikohet se ka pasur dhe ka problem me ligjin do të nxirret nga lista për deputetë të LDK-së. Do të veprohet sipas ligjit edhe për z. Raqi”, ka thënë Mustafa. Raqi bashkë me dy zyrtarë të tjerë të Obiliqit kishin nënshkruar marrëveshje të pranimit të fajësisë me Prokurorinë, më 8 dhjetor 2015-të, ndërsa përmban nënshkrimet e kryeprokurorit të Prokurorisë Themelore në Prishtinë, prokurores së rastit dhe 3 të akuzuarve, raporton “Ekspres”.
Me këtë marrëveshje është përcaktuar që prokurori i shtetit t’ia bëjë me dije Gjykatës se të akuzuarit Zejnullah Krasniqi, Haki Raqi dhe Bajram Paloji pajtohen të dënohen me burgim prej 5 muajve, në mënyrë që ai me pëlqimin e tyre të shndërrohet në dënim me gjobë siç është përcaktuar me dispozita ligjore. Gjykata pranoi ditën e sotme këtë marrëveshje mes prokurorisë dhe 3 të akuzuarve.
