Banorët e El Paso shprehen kundër vizitës së presidenti Trump në këtë qytet, pas incidentit me armë zjarri që mori jetën e 22 personave dhe la shumë të tjerë të plagosur.
SHBA u godit nga 2 sulme në një periudhë të shkurtët kohore, në qytetet e Ohios dhe El Pasos, ku si pasojë mbetën të vdekur 31 persona.
Presidenti amerikan u ka bërë thirrje amerikanëve gjatë një fjalimi të hënën që të dënojnë fanatizmin dhe supremacinë e bardhë, mirëpo liderët e komunitetit kanë thënë se presidenti ka një histori me postime provokative në rrjetin social, Twitter.
“Ky president, që ka ndihmuar në krijimin e urrejtjes dhe e ka bërë të mundshëm tragjedinë e së shtunës, nuk duhet të vijë në El Paso”, ka thënë kandidati demokrat për president, Beto O’Rourke, i cili është rritur në këtë qytet.
“Nuk na duhen më shumë ndasi. Neve na duhet të shërohemi. Ai nuk ka vend këtu”, ka shtuar O’Rourke, shkruan Rel.
Sipas mediave të huaja, 21-vjeçari që dyshohet se ka kryer sulmin, para se të niste të shtënat në El Paso, kishte postuar në rrjetet sociale një dokument kundër “pushtimit hispanik në Teksas”.
Ndërkohë, kongresistja e El Pasos, Veronica Escobar, i ka bërë thirrje Trumpit, “që të konsiderojë faktin se fjalët dhe veprimet e tij kanë pasur rol në këtë” incident.
“Nga perspektiva ime, ai nuk është i mirëpritur aty. Ai nuk duhet të jetë këtu derisa ne jemi në mërzi”, ka thënë Escobar për MSNBC.
Nga ana tjetër, kryetari i El Pasos, Dee Margo, ka thënë pas lajmit për vizitën e Trumpit se ai do ta mirëpresë presidentin vetëm sepse është detyra e tij për ta bërë një gjë të tillë.
