Kyriakos Mitsotakis tashmë është kryeministri i ri i Greqisë. Në bazë të Exit-Polleve të publikuara pas përfundimit të orarit zyrtar të votimit, ‘Demokracia e Re’ ka fituar bindshëm zgjedhjet e përgjithshme të zhvilluara këtë të diel.
Këto ishin zgjedhjet e para që pas çlirimit të Greqisë nga paketa e rëndë e masave anti-krizë, meritë e cila i njihet Alexis Tsipras. Mitsotakis ka premtuar ulje taksash, dhe më shumë fonde për sektorin publik për investime e vende të reja pune.
Ai ka thënë se nga nesër fillon puna, dhe se asnjë sekondë nuk duhet të shkojë dëm. Në një reagim për mediat, kryeministri i ri i Greqisë falenderoi të gjithë mbështetësit, dhe të gjithë ata që i besuan atij dhe forcës politike që drejton.
Gjatë fjalës së tij, ai premtoi se do të jetë kryeministri i të gjithë grekëve pa bërë dallime. “Nesër do të jetë një ditë e re për të gjithë Greqinë. Të bashkuar le të shkruajmë historinë tonë. Dua të falenderoj të gjitha ata që besuan tek ne, dhe premtoj se unë do të jem kryeministri i të gjithë grekëve”, tha ndër të tjera ai.
Syriza e kryeministrit në largim Alexis Tsipras, ka siguruar 77 deri 82 vende në parlament, duke u renditur kështu forcë e dytë politike. Ish-PASOK, që garoi me siglën e re të Aleancës për ndryshim janë renditur të tretët.
