Një 50-vjeçar, i shpallur në kërkim është arrestuar nga Policia e Elbasanit, pasi akuzohet për vrasje.
Bëhet fjalët për Sokol Taçe, i cili përdorte dhe një emër tjetër me inicialet V. D., banues në Elbasan. Taçe akuzohet se ka ekzekutuar në vitin 1998 me kallashnikov dy persona, në Itali.
Operacioni për ndalimin e 50-vjeçarit ka qenë i mirë organizuar për shkak të rrezikshmërisë së lartë ku u angazhuan, Policia Kriminale dhe Interpol Tirana.
Pas arrestimit, shqiptari pritet të ekstradohet drejt Italisë, për t’u përballur me drejtësinë e vendit fqinj.
Njoftimi i policisë:
Vijon puna për kapjen e personave të shpallur në kërkim ndërkombëtar. Kapet dhe arrestohet përkohësisht një shtetas shqiptar me qëllim ekstradimi drejt Italisë.
Strukturat e Drejtorisë Vendore të Policisë Elbasan, në bashkëpunim me Drejtorinë Hetimore në Departamentin e Policisë Kriminale dhe Interpol Tirana, pas një pune të mirëorganizuar dhe profesionale, në bazë të informacioneve të marra, bënë kapjen dhe arrestimin e përkohëshëm me qëllim ekstradimin drejt Italisë të shtetasit shqiptar të shpallur në kërkim ndërkombëtar:
T., (alias V.D.,) 50 vjeç, lindur dhe banues në Elbasan.
Kapja dhe ndalimi i tij u bë pasi Gjykata e Bergamos në Itali, ka vendosur masën e sigurisë “Arrest në burg”, për veprën penale “Vrasja me paramendim”.
Rrethanat e ngjarjes:
Më datë 10.10.1998, në Osio Sotto/Beragamo, shtetasi S. T., (alias V. D.), në bashkëpunim me shtetasin P. D., kanë qëlluar me armë zjarri automatikë në drejtim të shtetasve F. K. dhe A. K., të cilët kanë humbur jetën.
Materialet hetimore i kaluan Prokurorisë pranë Gjykatës së Shkallës Parë Elbasan për veprime të mëtejshme.
