Nga: Edlira Dyrmishaj, Psikologe Klinike
18 Qershori konsiderohet nga OBSH si Dita Ndërkombëtare Sensibilizuese ndaj çrregullimit të panikut. Për shumë nga ju, (dhe personat që në heshtje dhe shpesh edhe me turp vuajnë nga ataket e panikut janë shumë më shumë nga ç’mund të mendoni). Ajo që duhet të dini rreth atakeve të panikut në vija të trasha është se pikësëpari, rreziku në të është zero, edhe pse alarmi dhe ndjesia e asgjesimit pushton gjithë qenien tuaj.
Pjesa dërrmuese e të rinjve përjetojnë atake paniku si pasojë e përdorimit të disa narkotikëve. Një atak paniku mund të qetësohet me qetësues, të cilët relaksojnë fiziologjinë tonë, por nuk mund të trajtojnë frikërat obsesive që ai zhvillon. Ato trajtohen përmes psikoterapisë. Sa më parë të drejtoheni te një psikolog pasi të vini re simptomat fizike të një ataku paniku, aq më shpejt do ti kaloni ato. Vini re! Mos ngatërroni termat atak paniku me atak kardiak!
Nuk kanë lidhje me njëri tjetrin, edhe pse ajo që tmerron më shumë personat është pikërisht ndjesia se po ju merret fryma, dhe se zemra po ju “del nga vendi”. Është e frikshme dhe traumatike kur nuk ke informacion. Pas atakut të parë, personit i duket sikur ka shpëtuar aksidentalisht nga vdekja. Për shkak të memories së organizmit tonë, ai do të përsëritet sërish. Mos e humbni toruan! Nuk ju dëmton. Nuk ju vdes. Nuk ju çmend. Nuk ju dobëson as zemrën, e as nervat. Madje prezenca e tij është një tregues se organizmi juaj është i fortë dhe i shëndetshëm. Eliminoni pijet me kafeinë, cigaret dhe pijet energjike. Bëjeni aktivitetin fizik pjesë të përditshmërisë suaj.
Hidhni pas shpine mendimet negative,dyshimet e hamendësimet “po sikur” dhe bëni ekzaktësisht të kundërtën e asaj që ju sugjeron mendimi obsesiv. Truri juaj prodhon deri në 70000 mendime në ditë në gjendje normale, mos u fokusoni në to. Merreni me sportivitet. Mendimi juaj ka të nevojë të edukohet nga ju, ndaj mos lejoni që sjelljet e mendjes suaj të vendosin për realitetin e jashtëm.
Është momenti të ulni pak ritmin dhe të kujdeseni për veten, t’i kushtoni pak më shumë kohë e ledha. Dhe si përfundim, nëse prej kohësh jeni strukur në vorbullën e mendimeve obsesive, mos nguroni, mos kini turp! Drejtohuni te specialistët e shëndetit mendor.
Mos nxitoni të merrni barna, para se të bëni një konsultë te një psikolog klinik!
TIRANA TODAY
