Kryeministri Edi Rama u zhvendos këtë pasdite në Librazhd, në kuadër të fushatës zgjedhore.
Në fjalimin e tij, Rama theksoi se socialistët do të ecin të palëkundur drejt 30 qershorit, pasi sipas tij ky është i vetmi proces për të mbrojtur demokracinë dhe Shqipërinë në të ardhmen.
Ndërkohë, daljen nga Parlamenti të opozitës, Rama e konsideroi një zgjedhje fatale dhe “vetëvrasje politike”, ndërsa shtoi është i detyruar të futet në një garë pa kundërshtarë.
“Kundërshtarët tanë kanë bërë një zgjedhje fatale; politikisht duke ikur nga Parlamenti, dhe duke u transformuar në një lëvizje që predikon dhunë, sherr dhe konflikt. Zgjedhja jonë është të qëndrojmë të palëkundur që në 30 qershor të zhvillojmë këtë proces. Nuk është i miri i mundshëm, por është e vetmja rrugë për tu ndarë nga hienat e së shkuarës, që për 30 vjet i kanë shkaktuar këtij vendi telashe të panumërta”, tha Rama.
Sa i përket insistimit të mazhorancës që zgjedhjet vendore mos të shtyhen, por të mbahen në 30 qershor, kryeministri argumentoi duke thënë se: “Nëse shtyhen zgjedhjet sot, duke shkelur ligjin, vetëm se një palë ka dalë nga binarët, nesër këtë gjë do ta bëjë dhe një palë tjetër, dhe kush e di për sa vite ne nuk do të kemi një proces ku politikanët të zgjidhen nga popullit. Ka njerëz të mirë që nuk i pëlqejnë zhurmat dhe pyesin “Pse nuk shtyhen zgjedhjet?”. Nëse ka një njeri që do të ishte me i interesuari po të ishte për interesin personal, do të isha unë.
Zgjedhjet janë penguar për t’u kapur nga ata që nuk e kanë thjesht te zgjedhjet. Basha dhe aleatët kanë frikë nga zgjedhjet sepse nuk na mundin dot. Ata duan t’i kapin zgjedhjet peng sepse duan të pengojnë çeljen e negociatave me BE-në. Kjo është arsyeja pse nxisin dhunë. Për të krijuar idenë se këtu ka një kryengritje për të përmbysur një qeveri të korruptuar”, shtoi Edi Rama
