Nuk ka më asnjë dyshim, Maurizio Sarri do të jetë trajneri i ri i Juventusit. Pas largimit të Massimiliano Allegri, tekniku italian është favoriti më i madh për të marrë përsipër “Zonjën e Vjetër.”
“Juventusi do të njoftojë emërimin e Maurizio Sarri si trajnerin e tyre të ri në çështje ditësh”, shprehet eksperti evropian i futbollit, Julien Laurens.
Marrëveshja mes teknikut italian dhe skuadrës së Juventusit është arritur prej kohësh, teksa njoftohet se Sarri i ka thënë skuadrës së Chelsea se dëshiron të largohet nga klubi dhe do të kthehet në Itali.
Sipas “La Gazzetta dello Sport”, Sarri do të firmosë një kontratë 3-vjeçare nga e cila do të përfitojë shumën neto prej 6 milionësh euro në sezon.
Chelsea nuk pritet të jetë një pengesë në këtë marrëveshje pasi të dyja skuadrat kanë një marrëdhënie shumë të mirë me njëra-tjetrën.
Burime nga “La Gazzetta dello Sport” thonë se Sarri dhe Juve do të firmosin zyrtarisht kontratën e re brenda javës së ardhshme.
Murizio Sarri u bë trajner i skuadrës së Chelsea verën që kaloi dhe pati një sezon të parë mjaft të suksesshëm.
