Nga: Lutfi Dervishi
Finalja e Champions League u hap mbrëmë me një minutë zi, në kujtim të Antonio Reyes, ish futbollisti Arsenalit, që ndërroi jetë në një aksident rrugor.
Ai po ngiste makinën me 193 km/orë! Me shpejtësi të tillë në makinë, zor se të jepet shansi për të gabuar dy herë! 1.3 milionë njerëz humbin jetën çdo vit nga aksidenti rrugor, dhe miliona të tjerë janë të gjymtuar. E thënë ndryshe, çdo minutë që kalon, 3 njerëz vdesin nga aksidenti me makinë.
Arsyeja kryesore e aksidenteve rrugore është shpejtësia. Aksidentet rrugore janë sot shkaku kryesor i vdekjes së fëmijëve dhe të rinjve të moshës 5-29 vjeç.
Ligjvënësit dhe autoritetet në shumicën e vendeve të botës kanë vendosur kufizimin e shpejtëisë në rrugë, për të ulur numrin e aksidenteve.
Por megjithë rezultatet, numri viktimave është i konsiderueshëm!
Po çfarë do të ndodhte nëse do të merreshim me të “keqen” që në burim. A nuk ka ardhur koha që industritë e makinave të detyrohen me ligj, që të mos prodhojnë makina me shpejtësi mbi 130 km në orë?!
