Na ndajnë vetëm disa minuta nga protesta e opozitës së bashkuar, e cila nis sot në orën 18:30 para Kryeministrisë. Në deklarata të ndryshme, liderët e opozitës, Basha dhe Kryemadhi kanë paralajmëruar se kjo protestë do të jetë më e madhja dhe vendimtare për 15 vitet e ardhshme.
Madje, Kryemadhi paralajmëroi se do të ketë trazira, teksa tha në një emision televiziv se «97-a s’është asgjë para asaj që do ndodhë në protestën e sotme».
Që paraditen e sotme autobusë dhe makina janë nisur nga të gjitha qytetet e Shqipërisë, për t’u bashkuar sot para Kryeministrisë, ku kërkohet largimi i kryeministrit Rama dhe krijimi i një qeverie tranzitore.
Ambasada e SHBA-vë në Tiranë, në një reagim bëri thirrje që të gjithë protestuesit të shmangin dhunën.
Por, si parashikohet të jetë kjo protestë, me trazira apo paqësore?
Në një sondazh të publikuar nga Tirana Today, shumica e qytetarëve mendojnë se sot do të ketë trazira.
Nga 893 votues, 527 prej tyre mendojnë se gjatë protestës do të ketë trazira, ndërsa pjesa tjetër mendojnë se ajo do të jetë paqësore.
Gjithsesi, mbetet të shohim nëse opozita ka një skenar të përgatitur që synon rrëzimin e Ramës sot, apo incidentet do të jenë të ngjashme me ato të radhëve të kaluara./ Tirana Today
