Kreu i Bindjes Demokratike njihet si kritiku më i madh i djathtë i Bashës, që kur ky i fundit e hoqi atë nga lista e kandidatëve demokratë.
Vetëm pak ditë më parë, Patozi vendosi të rikthehet fuqishëm në politikë, teksa regjistroi në KQZ partinë Bindja Demokratike.
Sot, një parti aleate e PD-së, Partia Bashkimi Demokrat Shqiptar, me kryetar Ylber Valterin ka depozituar në Kolegjin Zgjedhor ankimin në të cilin kërkon çregjistrimin e Partisë “Bindja Demokratike”, pasi e konsideron atë si joligjore.
Këtë ankim, Patozi ia adreson Bashës, për të cilin shkruan se ndjehet i rrezikuar dhe po përpiqet që BD të mos marrë pjesë në zgjedhje.
“Përdorimi i disa klubeve me maska për të shantazhuar BINDJEN DEMOKRATIKE, që ajo të shmanget nga gara, do të dështojnë ashtu siç dështoi edhe fushata qesharake e gjetjes së nënshkrimeve të parregullta, të cilat u mblodhën në një kohë rekord”, shkruan Patozi, ndërsa përmbyll se partia e tij është një aleancë me demokratët në të gjithë vendin, përveç Bashës.
Postimi i Patozit:
REAGIM PAS KËRKESËS SË NJË PARTIE FANTAZËM PËR ÇREGJISTRIMIN E “BINDJES DEMOKRATIKE” NGA ZGJEDHJET
Lulëzim Basha është angazhuar seriozisht në betejën kundër BINDJES DEMOKRATIKE, tanimë duke u përpjekur ta pengojë atë që të marrë pjesë në zgjedhje.
Ndërkohë që për të gjithë demokratët shqiptarë kundërshtar mbetet Edi Rama dhe qeveria e tij, për Lulzim Bashën kundërshtar është BINDJA DEMOKRATIKE, pasi, me sa duket, atë e shikon si rrezik për karriken e tij.
Përdorimi i disa klubeve me maska për të shantazhuar BINDJEN DEMOKRATIKE, që ajo të shmanget nga gara, do të dështojnë ashtu siç dështoi edhe fushata qesharake e gjetjes së nënshkrimeve të parregullta, të cilat u mblodhën në një kohë rekord.
BINDJA DEMOKRATIKE vazhdon t’i qëndrojë vendimit të saj për të garuar në çdo bashki të vendit, përveç atyre ku mund të rikandidojnë bashkiakë të djathtë në detyrë ose kandidatë të pavarur.
Ajo është në një aleancë të gjerë me demokratët shqiptarë në gjithë vendin, përveç Lulzim Bashës, i cili ndjehet më i kërcënuar nga BINDJA, se sa nga Edi Rama
