Banorët e Astirit, si çdo mbrëmje kanë dalë në rrugë për të protestuar kundër shembjes së ndërtesave të tyre, ndërsa kanë lëshuar dhe deklarata kundër qeverisë.
Një nga banorët shprehet i bindur se kauza e tyre nuk do të përfundojë., teksa shtoi se protesta e banorëve të Unazës së Madhe ia ka shkurtuar këmbët karriges së kryeministrit Rama dhe se nuk do të ndalojnë deri në rrëzimin e tij.
“Nuk do ta lëmë këtë kauzë deri në ditët e fundit të jetës nëse është nevoja, do të fusin 20 në burg do të dalin 400 në rrugë. I kemi thënë se Unaza e Re do t’ia shkurtojë këmbët e karriges së tij por ai nuk e besoi. Prandaj ne nuk do të kemi mëshirë, nuk tërhiqemi deri sa ta rrëzojmë qeverinë e tij që drejtohet nga krimi dhe kriminelët. Ky nuk është shteti që duam, këta nuk janë shqiptarë, prandaj përgatituni për ti dhënë përgjigjen që meriton”, tha njëri prej banorëve.
Ndërkohë, protestës së banorëve i është bashkuar edhe ish-deputeti, Klevis Balliu i cili tha se opozita do të luftojë me çdo çmim dhe me çdo mjet për të zhdukur Ramën nga pushteti.
“Ne do të luftojmë me çdo çmim dhe çdo mjet për ta zhdukur këtë faqezi. Ju ftoj nesër në orën 6 të vazhdojmë revoltën tonë . Revoltë që nuk ka ndodhur kurrë në histori. Asnjë parti nuk bllokon dot 12 qarqe. Qytetarët do bllokojnë vendin kundër një qeverie. Të jeni më se të sigurt të gjithë ata skeptikë se ky është vetëm fillimi, protesta do të jetë deri në shfarosjen totale të këtij regjimi”, tha Balliu.
