Detaje të reja kanë dalë në dritë sa i takon vrasjes së dyfishtë ndodhur mbrëmë në qytetin e Laçit, ku nga të shtënat me armë zjarri humbën jetën dy të rinjtë, Jani Jushi, 30-vjeç dhe Mikel Jushi, 35-vjeç. Paraprakisht dyshimet e para lidhen me konflikte të vjetra mes autorëve dhe dy viktimave, që janë edhe kushërinj të parë.
Ngjarja
Ngjarja e rëndë ndodhi rreth orës 20:15, në lagjen nr. 1 në qytetin e Laçit, afër një lokali, ku ndodheshin viktimat dhe autorët. Dëshmitarët kanë thënë se dy viktimat kanë qenë në lokal, dhe fillimisht kanë debatuar me autorët.
Dy palët më pas kanë dalë jashtë lokalit. Teksa kanë parë që autorët kishin armë me vete, dy kushërinjtë janë larguar me vrap. Por, autorët i kanë ndjekur për rreth 100 metra Mikel dhe Jani Jushin, ku i kanë qëlluar disa herë me pistoletë.
Plumbat i kanë kapur disa herë ne trup kushërinjtë, ndërsa përpiqeshin t’u shmangeshin, por kanë mbetur të plagosur rëndë. Mikel Jushi dhe Jani Jushi u dërguan në gjendje të rëndë për jetën në një spital privat në Tiranë, për ndihmë të specializuar, por kanë ndërruar jetë si pasojë e plagëve që morën.
