Kreu i LZHK, Dashamir Shehi është shprehur se nuk është kundër negociatave me partitë e tjera politike, por që thekson se do të zhvillohen në rast kur çështja për të cilën negociohet është diçka e madhe dhe me vlerë.
I ftuar në “Fax News”, Shehi teka po komentonte koalicionin opozitar, deklaroi se sipas tij është një rezultat i një marrëveshjeje disa vjeçare dhe se ideja kryesore që i bashkon të gjitha këto parti është lufta kundër arrogancës së Ramës dhe shkatërrimit të Shqipërisë nga qeverisja e tij.
“Koalicioni është finalizimi i një marrëveshjeje disa vjeçare. Çdo ide e re, që nxit lirinë brenda një partie e konsideroj shumë të vlefshme. Ideja që pushteti që po na qeveris është arrogant, na dhunon si njerëz, po shkatërron ekonominë është ideja që na bashkon si opozitë. Ska nevojë të shkosh te një noter për të ndërtuar një koalicion. Ne nuk po e bëjmë këtë koalicion për pushtet po për hir të qytetarëve.” u shpreh Shehu.
Ndër të tjera, ish-deputeti u shpreh se kreu i PD, Lulzim Basha u ka premtuar partive të koalicionit ndryshim të sistemi zgjedhor.
“Ne kemi marrë një premtim nga Basha për të ndryshuar sistemin zgjedhor. Duhet të bashkojmë Shqipërine dhe të largojmë shqiptarët nga flamujt partiakë. Jemi bashkuar me bindjen që Basha të sakrifikojë interesat e tij për të mirën e përgjithshme të Shqipërisë.
Sa i përket “Bindjes Demokartike”, Shehi uron që kjo parti ta bëjë me të vërtetë opozitë, ndërsa thekson se i duket absurd krijimi i një partie vetëm një ditë para rregjistrimit në KQZ.
“Uroj Bindja Demokratike të bëjë me të vërtetë opozitën por koha do e tregojë këtë gjë, nëse janë me të vërtë kundër regjimit të Ramës.
Regjimi që po ndërton Rama është krimi më i rëndë që është bërë në 27 vite. Unë ngre në pikëpyetje nëse janë në të vërtetë opozitarë të Qeverisë, por që janë kundërshtarë të Bashës kjo gjë nuk më shqetëson dhe nuk e paragjykoj pasi çdo njeri ka mendimin e vet.
“Kam kontakte të vazhdueshme me zotin Patozi dhe nuk paragjykoj asnjë njeri. Por një parti që rregjistrohet në KQZ në ditën e fundit, pa program nuk më pëlqen, mund të ishte bërë 6 muaj më parë psh”, tha Shehi.
