Kryeministri Edi Rama ka marrë pjesë në një aktivitet, ku është prezantuar sondazhi kombëtar mbi cilësinë e mësimdhënies.
Gjatë fjalës së tij, Rama u zotua se qeveria është e angazhuar për plotësimin e pikave të Paktit për Universitetin. Po ashtu, kreu i Qeverisë deklaroi se karta e shumëpritur e studentëve nis të shpërndahet brenda muajit.
“Angazhimet e marra në dokumentin e paktit për universitetin janë angazhime që do të ndiqen me seriozitet nga Ministra e Arsimit dhe më pas nga qeveria. Sot jemi në kushtet kur një sërë aspektesh janë adresuar dhe të tjera do të adresohen. Para pak ditësh karta e studentit që do fillojë të shpërndahet brenda muajit maj fillon me 40 shërbime por do ketë edhe të tjera”,– tha Rama.
Kryeministri foli edhe për gjendjen e universiteteve në kohën kur mori pushtetin, teksa tha se ishte një “situatë xhungle”.
“Faktikisht ne jemi sot në situatën kur po vendosim disa piketa që Europa i ka vendosur kohë më parë, por dua ta theksoj se e kemi nisur këtë rrugë nga një situatë xhungle në universitete, ku jepeshin diploma pa vlerë”,– theksoi ai.
