Refugjatë nga shumë vende të botës ndodhen në kampin Dhiavata prej 3 ditësh.
Pas lajmeve false që u publikuan në rrjetet sociale se do hapej pika kufitare Idomeni, me Maqedoninë e Veriut, një fluks i madh refugjatësh nga disa zona të Greqisë kanë arritur në Dhiavata, si dhe kanë bllokuar stacionin e trenit për 24 orë, ndërsa kanë blerë gjithë biletat për Selanik.
Pas disa përplasjeve që refugjatët patën me autoritetet greke, policia i ka bindur ata se kufijtë nuk do të hapen dhe, nga dje natën deri sot paradite, 874 refugjatë janë kthyer me autobusë në kampet ku strehoheshin më parë, ndërsa rreth 50 refugjatë të mbetur, janë larguar pasdite.
Një numër i madh i tyre është strehuar në kampin e madh të refugjatëve në Kacika, Janinë, ku ndodhen rreth 1000 refugjatë të vendosur nga 7 veta në një kontejnerë 30 m, ndërsa kushtet janë tejet të vështira, mungojnë sendet bazë, sendet higjienike ndërsa bëhen vazhdimisht thirrje për vëmendjen e qeverisë greke si nga opozita ashtu dhe nga organizata jo-qeveritare.
