Kryetarja e LSI-së udhëtoi drejt Cërrikut, për tu njohur më nga afër me problemet që kanë fermerët e kësaj Bashkie. ‘Nuk duhen harruar fermerët, sepse bujqësia mban barrën kryesore të ekonomisë shqiptare’, u shpreh kryetarja e LSI. Duke theksuar se problemet e fermerëve vazhdojnë të jenë po të njëjtat, asnjë masë nuk është marrë për përmirësimin e kushteve apo për të krijuar lehtësira në sektorin e bujqësisë.
Gjithashtu Kryemadhi u ndal tek subvencionet, duke theksuar se për fermerët janë zero dhe se përballë çmimeve shumë të larta, ata janë lënë të papërkrahur. ‘Buxheti i shtetit që i vjen në ndihmë fermerëve dhe blegtorëve nuk është as 0.7 përqind’, po sipas Kryemadhit.
“Ndihen të pashpresë, ndihen të pa përkrahur, ndihen dhe të vetmuar në të gjithë angazhimin e tyre, dhe në iniciativën e tyre që duan të bëjnë diçka për familjet e tyre. Mos të harrojmë që 20% e GDP-së, vjen si rezultat i bujqësisë shqiptare dhe subvencioni që vjen nga shteti nuk është as 0.7% e Buxhetit të Shtetit në ndihmë të fermerëve dhe të blegtorëve”, u shpreh Kryemadhi.
“Nga malësitë e Dibrës dhe sot nga fushat e Cërrikut, apo edhe nga kodrat e mrekullueshme të Dumresë, shikojmë se problemet janë të njëjta, si për blegtorët, ashtu dhe për pemëtarët, ashtu dhe për fermerët, ashtu dhe për ata që kanë investuar në serat e tyre edhe pse subvencionet janë 0. Ku çmimet janë shumë të larta për plasmasin, për hekurin. Ku ata paguajnë fatura shumë të larta të energjisë elektrike, për pompat e ujit, apo fatura të larta të ujit për vaditje. Prandaj është e domosdoshme për të mos i harruar fermerët, për të mos harruar bujqësinë shqiptare, sepse bujqësia shqiptare është ajo që mban barrën kryesore të ekonomisë shqiptare”, tha ndër të tjera Kryemadhi.
