Masakra e Rezallës, sot mbushen plot 20 vjet. Kosova ndër vite është përballur me pushtimin dhe masakrimin nga ana e serbëve. 98 shqiptarë u vranë nga ushtria dhe milicia serbe. Shtëpitë e familjeve të Rezallës dhe fshatrat përreth, me datë 5 prill të vitit 1999 mbetën të rrethuar nga ushtarët serbë. Kjo i kushtoi jetën banorëve të zonës, madje 44 prej tyre u zhdukën.
Burrat dhe djemtë e rinj ishin shënjestra kryesore. Kjo masakër konsiderohet si ndër më të rëndat në Kosovë, pasi vetëm 3 persona mundën të shpëtojnë.
Ramush Haradinaj e përkujton këtë masakër duke u shprehur se, “Rezalla është një plagë e hapur për Kosovën”.
“Masakra në Rezallë, 20-vjet më parë, nga e cila ende shumë të pagjetur, është plagë e hapur e Kosovës dhe i jep zë thirrjës sonë për drejtësi. Martirët e Rezallës, me sakrificën e tyre e mbajnë të freskët përjetësisht kujtesën tonë për rrugën e vështirë deri në liri.
Rezalla, si vatër e pamposhtur e luftës çlirimtare, e ka shkruar historinë me gjakun e bijave dhe bijve më të mirë, që nuk e kursyen jetën e tyre për t’iu bërë lirisë gurthemel. Lavdi e përjetshme martirëve dhe dëshmorëve!”, shkruan Haradinaj në Facebook.
