Elseid Hysaj, ka folur për mediat si kapiten i kombëtares në prag të ndeshjes së dytë eliminatore për në “Euro 2020”, përballë Andorrës. Sipas mbrojtësit shkodran të Napolit, ky grup lojtarësh do të bëjë diçka spektakolare dhe se do të arrijë kualifikimin.
Ndërsa sa i përket mosbesimit të Christian Panuccit te lojtarët e kombëtares, Hysaj është shprehur se ai e kishte gabim.
Si e pritët largimin e Panuccit?
Besoj që nuk duhet ta mendojmë punën e trajnerit. Kemi një ndeshje të rëndësishme që duhet ta fitojmë, na duhen tre pikë jo vetëm për Europianin, por edhe për moralin tonë dhe gjithë shqiptarët. Duhet të fitojmë dhe mos të mendojmë shumë për trajnerin.
Si kanë ndikuar gjithë këto ngajarje në këto ditë?
Jemi të gjithë me mëndjen që duhet të fitojmë. Do të jetë një ndeshje shumë e veshtirë dhe do ta kemi të vështirë të shënojmë ashtu siç e pati dhe Islanda. Nuk duhet të mendojmë për asgjë që ka ndodhur, duhet të vazhdojmë.
Si është situata në dhomat e zhveshjes?
Situata është shumë e mirë. Ndeshja e humbur nuk do na dënojë për të gjithë ndeshjet e radhës. Duhet ta harrojmë atë që ka ndodhur. Do jetë e vështirë po nuk e harruam humbjen. Jemi gati për të dhënë maksimumin në ndeshjen ndaj Andorrës.
Panucci tha se disa prej lojtarëve ka qarë… Si është gjendja psikologjike…?
Kështu e ka futbolli. Ne duhet të mendojmë për të mirën e ekipit Kombëtar. Nuk duhet të rrijmë mbrapa këtyre gjërave që ndodhëm. Jemi mërzitur, sepse kemi kaluar edhe çaste të bukura me trajnerin Panucci.
Nga i buronte mosbesimi Panuccit te ju?
Nuk e di nga i buronte. Çdo trajner ka mendimin e vet. Unë i besoj shumë kësaj kombëtareje. I njoh shumë mirë çunat. Kemi shumë besim dhe nëse na pyet përsëri do të themi se do kualifikohemi.
Pra ti mendon se ai e kishte gabim?
Unë mendoj se ai e ka gabim dhe mendoj se do të bëjmë diçka spektakolarë në vazhdim.
Çfarë mendoni për Andorrën?
Mendoj se Andorra është një ekip për t’u vlerësuar. E dimë çfarë skuadre ka. Shpresoj që me trajnerin tonë të arrijmë të marrim 3 pikë.
Ndihesh 100% kapiteni i kësaj skuadre?
Unë besoj se dhe me votim jam dhe moralisht. Unë jam afër me çunat dha ata janë afër me mua. Shpresoj të vazhdoj të jem kapiteni i kombëtares dhe ndihem shumë mirë me këtë përgjegjësi.
