Në zgjedhjet që janë duke u mbajtur në Tuz të Malit të Zi nuk është lejuar të votojë modelja e njohur Shqiptare, Emina Cunmulaj. Ajo ka deklaruar publikisht se e ka pasur të pamundur të votojë edhe pse është e pajisur me pasaportë dhe kartë identiteti malazeze.
Ajo ka pohuar për “Klankosova” se nuk e di arsyen specifike se përse nuk e kanë lejuar të votojë. Emina mendon që kjo lidhet me influencën e saj mbi popullin shqiptar të zonës së Tuzit.
“Jo, mua nuk më kanë lejuar të votoj, nuk më kanë shkruar …nuk e di arsyen pse, sepse kam pasaportë dhe kartë identiteti të Malit të Zi. Por mundem të paramendoj se ndoshta është për shkak se nuk po dojnë të më lejojnë sepse jam shumë me zë për vendin dhe popullin tim”, është shprehur modelja.
Kujtojmë se sot votohet në Tuz për të zgjedhur kryetarin e komunës, pasi prej 1 shtatorit 2018, Tuzi u shkëput si komunë nga Podgorica, një kërkese prej disa dekadash e komunitetit shqiptar. Thirrjet që shqiptarët të votojnë në këtë ditë historike nuk kanë munguar ditët e fundit nga Tirana, por dhe jashtë kufijve të Shqipërisë. Qendrat e votimit u hapën në orën 7 të mëngjesit, ndërkohë që kandidati shqiptar, Nik Gjeloshaj, është shprehur optimist për rezultatin.
