Disa prej 20 protestuesve të shoqëruar nga policia janë arrestuar mbrëmjen e sotme, për dhunimin e ambienteve publike. Mes tyre edhe ish-drejtori i Policisë Bashkiake, Florenc Hoxha. Nga kamerat e sigurisë disa prej të shoqëruarve kanë rezultuar të jenë pikërisht personat që kanë kryer akte dhune gjatë protestës dhe janë arrestuar.
Në Drejtorinë e Policisë së Tiranës ka pasur tension e përplasje mes deputetëve të Partisë Demokratike dhe policëve. Deputetët e PD-së kanë kërkuar të takojnë protestuesit brenda ambienteve të Drejtorisë së Policisë, por oficerët e policisë i kanë ndaluar. Deputeti Flamur Noka pasi doli nga Drejtoria e Policisë tha se numri i protestuesve të arrestuar është 7.
“Kemi një orë këtu pa asnjë përgjigje. Kur u ngjitëm sipër, me gjithë tentativat për të penguar fizikisht deputetët, kur u ngjitëm sipër gjetëm kupolën e policisë, i gjetëm si një tufë derrash me uiski, Red Bull e kishin shtruar. Gjithçka është filmuar. Ne na lanë në pritje pa na sqaruar.
Policia e Shtetit që duhej ti shërbente qytetarëve, ishte duke u zhgërryer jo në llucë, por në uiski e red bull e vodka. Gjoja ata po kryenin punën.
Dhunë nuk ka pasur, kjo ka qenë protesta më e madhe dhe më qytetare në këto vite të demokracisë. Njerëzit kanë shfryrë për qeverisjen Rama, për gjendjen. Sqarime? Do t’i marrin ata shumë shpejt. Qytetarët do t’ia japin.”, tha Noka për mediat.
Hetimet drejtohen nga drejtuesja e Prokurorisë së Tiranës Elisabeta Imeraj, ndërsa në grupin e pesë prokurorëve janë edhe Enkild Gjini dhe Kreshnik Ajazi. Veprat për të cilat është regjistruar hetimi janë shkatërrim prone, dëmtime me dashje, organizim të tubimeve të paligjshme dhe prishje e qetësisë publike.
