Anëtari i KPK, Lulzim Hamitaj është thirrur nga Prokuroria e Tiranës për të dhënë shpjegime. Hamitaj do të paraqitet sot në orën 13:00 tek organi i akuzës, në lidhje me akuzat që janë bërë ndaj tij për falsifikim të certifikatës së gjuhës angleze.
Po ashtu, Hamitaj është sulmuar vazhdimisht nga Partia Demokratike. Kanë qenë deputetët Enkelejd Alibeaj dhe Gazmend Bardhi ata që kanë akuzuar se Hamitaj kishte falsifikuar certifikatën e gjuhës angleze.
“Nëse në vitin 2015 Lulzim Hamitaj do të ishte i pajisur me certifikatë që provon se zotëron nivelin e përparuar C1, atëherë pse në aplikimin e vitit 2016, deklaron se zotëron anglishten në nivelin fillestar B1?”, deklaroi Alibeaj.
Nga verifikimi i të dhënave të sistemit TIMS, rezulton se shtetasi Lulzim Hamitaj, në datën 6 Prill 2015, ku pretendon se ka dhënë provimin dhe është pajisur me certifikatë të zotërimit të gjuhës angleze, nuk ka qenë në Shqipëri.
