Panathinaikosi u eliminua nga Kupa e Greqisë në mënyrë surprizuese, pasi në “ruletën ruse” ishte e pafuqishme përballë Lamias. Dy penallti të shpërdoruara për gjigantët grekë, mes të cilave numërohet edhe gabimi i Kaçes.
Mesfushori shqiptar gaboi nga pika e bardhë, duke mos i shënuar dot ish-shokut të skuadrës, portierit grek Melissas. Ky i fundit ka luajtur me Kaçen gjatë kohës kur ishin pjesë e PAOK. Duke e ditur më së miri karakterin e futbollistit të Shqipërisë, Melissas i ka thënë edhe disa fjalë për ta shpërqendruar disi lojtarin kundërshtar.
“Sigurisht, i thashë disa fjalë Kaçes por asgjë vulgare apo të keqe. Thjeshtë bëra pak humor me të. I fola pasi situata të tilla na kanë ndodhur shumë herë gjatë kohës që ishim te PAOK”, u shpreh për “Novasport” portieri grek, që u trajtua edhe si heroi i takimit.
