Ministri i emëruar nga Rama për të zëvendësuar Ditmir Bushatin, është një nga ministrat më të komentuar. Gent Cakaj duket se po has vështirësi në marrjen e postit, teksa Presidenti Meta jo vetëm që nuk ka dekretuar emërimin e tij, por as shkarkimin e Bushatit.
Por, emri i Gent Cakajt është përmendur edhe në mediat greke, teksa shkruajnë se ai premton rinovim në qeverinë Rama.
Gazeta ‘Protothema’ i ka kushtuar kësaj Cakajt një artikull me titull: “Vetëm 30 vjeç dhe kosovar, ministri i ri i Jashtëm i Shqipërisë”, ku shkruan për origjinën e tij, por edhe për moshën e re.
Pjesë nga artikulli:
Kryeministri Edi Rama vendosi të zëvendësojë Ditmir Bushatin me një kosovar 30-vjeçar. Siç tha vetë kryeministri shqiptar gjatë prezantimit, Gent Cakaj do të jetë figura që do sjellë rinovimin në qeveri. Këshilltari i deritanishëm i Ramës në postin e ri ka ngjallur mjaft debate, pasi janë të shumtë zërat që vënë në dyshim aftësitë e tij për këtë post. Megjithatë, vetë kryeministri shqiptar, i thirrur të mbrojë përzgjedhjen e tij deklaroi se “ministri i ri ka lexuar shumë më tepër libra sesa fjalë thoni ju kundër tij”. Cakaj ka studiuar në Kosovë, Belgjikë dhe Hungari, disponon dy diploma Bachelor dhe tre diploma master në Filozofi, Shkenca Politike dhe Juridik. Para këtij posti ishte ministër plotësues kompetent për BE-në, një arsye që prej shumicës posti i kryediplomatit konsiderohet “mesazh” i Shqipërisë për kthesën europiane të vendit.
