Ish-kryeministri Sali Berisha ka bërë sot publik denoncimin e një oficeri të Policisë së Shtetit, i cili thotë se me gradën kryekomisar po kryhet një korrupsion i jashtëzakonshëm nga ana e Ardi Veliut.
Sipas denoncuesit, për të marrë pikë shtesë, në mënyrë që të arrijnë gradën, kandidatët paguajnë nga 10 mijë euro nën dorë. Qytetari që i shkruan Berishës thotë se që nga data 01.11.2018, kur provimi për gradën ka qenë në fazën e aplikimit, e deri më sot, është kryer jo vetëm akt korruptiv nga Ardi Veliu dhe Aida Hajnaj, por një degradim i gjithë procesit te konkurrimit.
Ai nënvizon më tej se janë duke zvarritur procesin, duke u dhënë pikë shtesë në komisionet e apelimit kundrejt 10 mijë eurove, që paguajnë kandidatët për gradën kryekomisar, drejtpërdrejt dhe nëpërmjet sekserit Ilir Mandro, etj. Nëse e gjithë kjo skemë vërtetohet, qytetari garanton se do të dalë një aferë korruptive e gjithë sistemit.
