Liverpool ka arritur të kualifikohet në fazën tjetër të Champions League përballë Napolit, në një ndeshje mjaft të vuajtur. 1 me 0 ka përfunduar takimi në “Anfield” dhe në 1/16 kualifikohet PSG dhe Liverpool. Ndërsa Napoli edhe pse zhvilloi një ndeshje fantastike dhe krijoi shumë raste, tashmë duhet të zbresë në Europa League.
Napolitanët e Ancelottit ashtu si pritej e nisën ndeshjen në mbrojtje pasi me barazimin ishin të kualifikuar, ndërsa Liverpool e nis ndeshjen në ritëm të lartë. Mundësia e parë për gol është e italianëve. Hamsik godet bukur nga jashtë zone, por topi përfundon jashtë.
Në krahun tjetër Mane shtyn topin në rrjetë, por anësori e anulon për pozicion jashtë loje me të drejtë. Në minutën e 34’ erdhi goli i avantazhit për vendasit nga i përhershmi Mohamed Salah. Egjiptiani futet brenda zonës, driblon Koulibaly me lehtësi dhe shënon ndaj Ospina-s i cili mund të kishte bërë më mirë.
Napoli mundohet deri në fund për golin e barazimit dhe rrezikon portën e Alisson në minutat shtesë, por Liverpool mbahet deri në fërshëllimën e fundit duke siguruar kualifikimin.
Ndërkohë PSG ka bërë detyrën ndaj Crvena Zvezda duke fituar 4-1 në Beograd. Ishte Edinson Cavani ai që zhbllokoi rezultatin deri në minutën e 10’. Pak minuta përpara se të përfundonte pjesa e parë Neymar dyfishon rezultatin duke i dhënë një avantazh të rehatshëm miqve.
Gjithsesi, pas pushimit Gobeljic ngushton diferencën për vendasit, por Marquinhos në minutën e 74’ ka vulosur fitoren për francezët, ndërsa në fund ishte edhe Mbappe ai që shënoi golin e katërt. Me këtë fitore francezët kanë siguruar vendin e parë të grupit C me 11 pikë.
