Gjatë mesditës së sotme, studentët larguan me forcë pedagogun Jani Marka, i cili mori megafonin për të folur. Disa studentë kanë kërkuar largimin e tij, ndërsa të tjerë pretendojnë se ai po censurohet, pavarësisht se ka mbrojtur gjithmonë të drejtat e studentëve.
Postimet e fundit të profesorit, janë të gjitha të lidhura me protestën e studentëve.
Ndërkohë postimi i fundit i tij, para daljes në protestën e sotme ku ai nuk mundi të flasë, është thirrja për tu bashkuar të gjithë studentët në orën 10.00 te Ministria e Arsimit.
Por kush është Jani Marka?
Jani Marka është pedagog në Fakultetin e Shkencave të Natyrës, si profesor i biologjisë.
Ai është përfaqësues i Lëvizjes për Universitetin, e cila këto ditët e fundit është kundërshtuar nga studentët së bashku me kreun e kësaj Levizje, Arlind Qorrin.
Që nga viti 2003, kohë kur ka mbaruar fakultetin e Shkencave të Natyrës, ai është emëruar si profesor i biologjisë në këtë Universitet. Ka marrë doktoraturën (PhD) në prill të vitit 2014.
Shpesh herë e kemi parë pedagogun Jani Marka të mbrojë të drejtat e studentëve, duke iu bashkuar atyre në çdo protestë.
Sakaq, disa mbështetës të pedagogut Jani Marka, i Departamentit të Biologjisë në Universitetin e Tiranës dhe pjesë e “Lëvizjes për Universitetin”, kanë thënë se po tentohet të shuhet zëri i pedagogëve që mbështesin kauzën studentore.
“Ai është profesor biologjie, dhe ka ardhur këtu për të mbrojtur të drejtat tona, dhe nuk ka ardhur këtu në emër të asnjë lëvizje. Ai ka ardhur gjithmonë këtu për të mbrojtur të drejtat tona. Atë po tentojnë ta largojnë nga protesta për të na përçarë. Ata janë këtu për të krijuar përçarje midis nesh”, tha një student nga protesta.
https://tiranatoday.com/pedagogu-para-mediave-hengra-tek-protesta-sjam-une-e-keqja/