Lidhja Demokratike e Kosovës ka kërkuar sot dorëheqjen e kryeministrit Haradinaj dhe zëvendësit të tij, Fatmir Limaj. Kjo kërkesë vjen pas deklaratës së komisionerit Johannes Hahn se liberalizimi i vizave ka shumë mundësi të ndodhë në 2020 dhe jo në fund të 2018-ës.
“LDK kërkon që Asambleja e Kosovës mblidhet për një seancë të jashtëzakonshme për të diskutuar këtë çështje, ndërsa kërkon dorëheqjen e ekzekutivit. Kryeministri aktual dhe zëvendësi i tij, Limaj, kanë penguar, me dhunë dhe intrigë, përmbushjen e kritereve për liberalizimin e vizave”, thuhet në deklaratën e partisë.
Trazirat në politikën e vendit vijojnë, teksa një tjetër parti opozitare, konkretisht Albin Kurti i “Vetëvendosja” kërkon dorëheqjen e kryetarit të parlamentit Kadri Veseli dhe ministres së integrimit europian Dhurata Hoxha.
“Datat më të hershme për liberalizimin e vizave gjatë vitit 2018 janë dhënë vetëm nga Ramush Haradinaj, Kadri Veseli dhe Dhurata Hoxha. Të tre këta duhet të japin dorëheqjen,” shkroi Kurti në Facebook.
Ndërkohë, një deputet tjetër i partisë së Haradinajt, Blerim Kuçi, tha për mediat se ai do të mbajë premtimin e tij për të dhënë dorëheqjen nëse liberalizimi i vizave nuk do të ndodhë deri në fund të vitit 2018.
“Sigurisht që i qëndroj zotimit tim për të dhënë dorëheqjen nëse liberalizimi nuk do të ndodhë këtë vit,” tha Kuçi për Express në Prishtinë.
