Në kohën kur 4 shqiptarë kanë humbur jetën në Greqi brenda javës, në Tiranë vjen dokumentari “Drejtësi për Pëllumbin”.
Dokumentari është një investigim i mirëfilltë mbi vrasjen e lezhjanit Pëllumb Marnikollaj, në Komisariatin e Policisë Ano Patisia, në Athine, në 3 gusht 2016.
Investigimi dhe sjellja në formën e dokumentarit u realizua nga gazetari Aulon Kalaja. Premiera e dokumentarit u shfaq sonte në një ambient te hotel “Sheraton”.
Në dokumentar, në sajë të investigimeve të gazetarit me ndihmën e familjes, zbardhet e gjithë dinamika e ngjarjes.
Ngjarja e rëndë e ndodhur më 3 Gusht 2016, ka tronditur jo vetëm të afërmit e miqtë e tij, por mbarë komunitetin shqiptar në Greqi e gjetkë.
Viktima kishte një vendim gjykate detyrim paraqitje në polici dhe ai si zakonisht ishte paraqitur në komisariat duke respektuar ligjin dhe vendimin e gjykatës, me mendimin të rikthehej sërish në shtëpinë e tij, por ka ndodhur krejt ndryshe. Marnikollaj u paraqit në komisariat për mos tu kthyer më kurrë.
Policia greke njoftoi se shqiptari ndërroi jetë duke u hedhur nga kati i katërt i godinës së policisë. Sipas saj, ndaj 28- vjeçarit ishin ngritur akuza të tjera dhe për këtë arsye ai ndërmori veprimin ekstrem.
Kjo deklaratë e Policisë greke bie ndesh me atë që ndodhi realisht, pasi trupi i pajetë i të riut u dërgua në varrezë publike, pa identitet, duke ia lënë në dorë shtetit për ta varrosur, edhe pse vdekja kishte ndodhur në ambientet e Policisë.
Misteri shtohet më tepër, kur në fshehtësi të plotë, Policia u ka kërkuar drejtuesve të varrezës “Agio Anargioro” për ta varrosur Marnikollajn si person të paidentifikuar.
“Sikur kërkimet e djalit, Artanit, të kishin zgjatur edhe një ditë tjetër, trupi i Pëllumbit do të zhdukej dhe nuk do ta kishim gjetur dot”, u shpreh babai i Pëllumbit. Trupi i pajetë i 28- vjeçarit prej 10 ditësh është mbajtur në frigoriferin e varrezave dhe do të varrosej pa emër, pa u zbatuar as ligji grek, që parashikon mbajtjen e kufomave të paidentifikuara për 1 muaj.
Avokatja greke Maria Konstantopoulou ka rrëfyer se ishte tronditur shumë kur kishte parë viktimën në morgun e spitalit.
“Nuk më ka ndodhur ndonjë here në jetë të shohë një viktimë të tillë, kaq trishtuese”, tha avokatja duke fajësuar veç policisë edhe shërbimin e spitalit.
Avokatja tha se autoritetet e policisë e bënë me dije se kanë njoftuar ditën e dytë të ngjarjes Ambasadën Shqiptare. Ambasada mohon akuzat ndaj saj, por tentativa për të varrosur me shpejtësi viktimën implikon dhe ambasadën shqiptare në Athinë.
Kjo vrasje ka treguar dhe një herë bashkëpunimin mes institucioneve greke për ta mbyllur edhe këtë vrasje. Nga policët që mbulojnë vrasësit kolegët e tyre, mjekët ligjorë dhe prokurorët, dhe në fund mediat, të gjithë së bashku vepruan në fshehtësi për të humbur gjurmët e një vdekje të dhunshme.
Të gjitha provat e mbledhura në dokumentar tregojnë që Pëllumb Marnikollajn nuk vrau veten por u vra nga policia greke dhe ata shfrytëzuan të gjitha institucionet për të mbyllur çështjen. TIRANA TODAY
