Së shpejti pritet që fondacioni “Fundjavë Ndryshe” të hapë selinë e saj në Kosovë. Ky lajm është përcjellë përmes një postimi në Instagram, ku nuk kanë munguar edhe komentet në lidhje me këtë risi.
Ky postim është pritur mjaft mirë nga ana e qytetarëve, por ka edhe nga ata skeptikët. Një prej tyre është i mendimit se ka ende shumë punë për tu bërë në Shqipëri, për tu hedhur më pas në Kosovë, e dhënë kontributin.
Por ky koment nuk ka shkuar në vesh të shurdhër, duke marrë një përgjigje nga themeluesi i “Fundjavë Ndryshe”, Arbër Hajdari. Në kthimin e përgjigjes në Instagram, Arbër Hajdari i vë në dukje se Kosova është Shqipëri, dhe se shënimi i komentuesit nuk gjen vend. “Fundjavë Ndryshe” e ka dhënë me prova se shumë është bërë për familjet në nevojë, e për këtë Arbër Hajdari premton se ende do të bëhet në këtë drejtim. Ndër të tjera ai nënvizon faktin se të jesh shqiptar nuk është çështje territoresh, por çështje zemre, ndaj puna e pakursyer nuk do të ndalet.
“Kemi bërë shumë punë dhe kemi akoma shumë, shumë punë në Shqipëri. Kurrësesi nuk mund të thuash “komshiut”, pasi Kosova është Shqipëri. “Fundjavë Ndryshe” do të jetë kudo ku shqiptarët kanë nevojë. Sepse të jesh shqiptar, nuk është çështje territoresh, por çështje zemre. Përderisa në Kosovë ka njerëz që duan të dhurojnë përmes nesh, përderisa ka rini e cila do të na përkrahë, përderisa ka familje shqiptare në nevojë, nuk ka asnjë arsye që juve të mos ju gëzoj ky lajm! Qofsh mirë”, përfundon mesazhi i Arbër Hajdarit.
