Në protestën e zhvilluar ditën e enjte para Kuvendit, nga banorët që preken nga ndërtimi i Unazës së Re, kanë mbetur të plagosur 12 efektivë të Policisë së Tiranës. Në tentativë për të çarë kordonin policor, banorët u përplasën me policinë ndërsa nuk mungoi hedhja e sendeve të forta, shashkave e tymueseve.
Efektivja e policisë, Ina Nuka, është një ndër të plagosurit më rëndë, pasi ka këputur gishtat e dorës. Ish-ministri i Brendshëm, Saimir Tahiri shpreh solidaritet me efektiven e policisë Ina Nuka, si dhe hedh akuza ndaj klasës politike që “i bie në kurriz policisë”.
“Kurre mos ardhte me dita kur politika i bie ne kurriz policit, kaq dhunshem sa sot! Njeri e gjumton ne rruge, tjetri i thote “ndrikull”, tjetri akoma i thote “vete i fute duart te fishekzjarri”.
Ne krahun tend Ina! Shperim te shpejte. Ate qe ben ti dhe koleget e tu ne nje dite pune, keta palaco se kane bere ne 25 vjet te marra bashke…e sot taksirati yt, duroj edhe keta bashke me dhimbjen.
Te jam prane me shpirt”, shkruan Tahiri në një postim në rrjetet sociale.
