Kombëtarja U-21 e drejtuar nga Alban Bushi vazhdon me paraqitjet e mira në fushën e blertë. Ata kanë mposhtur 3-2 me përmbysje Maltën, në sfidën e dytë e cila u luajt në Shkodër, në stadiumin “Loro Boriçi”. Minutat e parë të kësaj sfide foli më shumë për Shqipërinë, të cilët arritën të kalonin në avantazh në minutën e 11’ me Shefitin.
Pas një goditje dënimi për Shqipërinë në pozicion ballor, Muçolli ekzekutoi një skemë duke pasuar te Imeri i cili kalon menjëherë topin në zonë te Shefiti. Ky i fundit kaloi topin mbi portierin me një prekje mjaft të bukur duke kaluar kuqezinjtë menjëherë në avantazh.
Ndërsa në minutën e 37’ erdhi edhe barazimi nga miqtë me autorin Brinkat, të cilët përfituan nga një përgjumje totale e prapavijës kuqezi që la sulmuesin maltez të shkojë i qetë para Dajsinanit dhe të mposhtë portierin duke barazuar shifrat. Në pjesën e dytë, Malta përmbysi shifrat në 1-2, përsëri me Brinkat, pasi një gafë tjetër e kuqezinjve në mbrojtje bëri që maltezët të përmbysnin shifrat me 11-metërsh.
Kjo përmbysje nuk ka zgjatur shumë pasi sulmuesi i Partizanit, Hebaj bën mrekullinë. Pas një goditje dënimi, topi përfundoi në shtyllën e dytë dhe devijohet nga një mbrojtës. Për arbitrin ishte penallti për prekje të topit me dorë, maltezët protestuan por vendimi nuk u ndryshua. Hebaj merr përsipër ekzekutimin dhe e dërgon topin në rrjetë.
Ndërsa në minutën e 87’ ka qenë përsëri Hebaj i cili përmbysi rezultatin duke e çuar topin në rrjetë.
Kujtojmë që takimi i parë që u zhvillua pak ditë më parë në stadiumin “Sleman Stërmasi” u fitua nga Shqipëria me rezultatin e pastër 2-0.
