Sot përfundon afati Kushtetues i presidentit Meta, për të dekretuar Sandër Lleshajn Ministër të Brendshëm. Kreu i shtetit duhet të vendosë nëse do të dekretojë ose jo propozimin e kryeministrit Rama për pasues të Fatmir Xhafajt. Një javë më parë, kryeministri Rama i ridërgoi presidentit emrin e Lleshajt, pasi më herët Meta kishte refuzuar ta dekretonte, pasi nuk kishte krijuar ende bindjen e plotë.
Pas ripropozimit të Ramës, presidenti Meta rinisi konsultimet me institucionet, ndërsa në një letër drejtuar kryeministrit, Ministres së Mbrojtjes dhe kryetarit të Kuvendit, rendiste 14 pyetje për Sandër Lleshajn, duke këmbëngulur te statusi dhe karriera prej ushtaraku. Nga ana tjetër, mësohet se Ministria e Mbrojtjes e ka përfunduar një dosje për Lleshajn, duke i dorëzuar presidentit përgjigjet.
Përmes një letre drejtuar Metës të hënën, Sandër Lleshaj shprehej se hiqte dorë nga karriera ushtarake dhe grada gjeneral. Aktualisht, Sandër Lleshaj është i komanduar si ministër.
I ftuar mbrëmjen e së enjtes në “Open” të gazetares Eni Vasili, Meta u shpreh se nuk do t’ia lejonte asnjëherë vetes të shkelte Kushtetutën, teksa po fliste për çështjen e dekretimit të kandidaturës së Sandër Leshit si Ministër i Brendshëm.
“Që ditën që kam pranuar këtë detyrë, e cila është detyra e lartë në vendin tonë, dhe kam vënë dorë mbi Kushtetutë, kam marrë përsipër të gjithë përgjegjësitë për të respektuar Kushtetutën. Për rastin konkret është krijuar një situatë, por jo nga mua. Jam i bindur që kam vepruar në interes të respektimit të Kushtetutës dhe interesit publik, dhe kam për të bërë të gjitha përpjekjet e mia për të dhënë një zgjidhje të drejtë. Çështja e emërimit të një ministri, është një çështje që kërkon bashkëpunimin e tre institucioneve, Kryeministrit, Presidentit dhe Kuvendit”, tha Meta.
Arsyeja e rrëzimit të dekretit të parë?
“Çështja është më e qartë për opinionin pas iniciativës së dytë të Ramës, për të propozuar sërish kandidaturën e z. Lleshi. Pyetjet që unë bëra publike e sqarojnë. Kemi të bëjmë me sqarimin e situatës së ushtarakut dhe ministrit të cilat janë të papajtushme me Kushtetutë. Unë nuk kam marrë asnjë vendim. Unë po bashkëpunoj për të sqaruar. Ne po vazhdojmë diskutimet aktualisht. Një shkelje e qartë e Kushtetutës është një përgjegjësi e madhe e presidentit”, deklaroi ai.
